ഗർഭധാരണത്തിന് ശേഷം എത്ര ദിവസം കഴിഞ്ഞാൽ പ്രഗ്നൻസി തിരിച്ചറിയാൻ സാധിക്കും?

എപ്പോൾ ഗർഭം ധരിക്കാൻ സാധിക്കും?

ഒരു ആർത്തവചക്രത്തിന്റെ ദൈർഘ്യം കണക്കാക്കുന്നത് ആർത്തവം തുടങ്ങുന്ന ആദ്യ ദിവസം മുതൽ അടുത്ത ആർത്തവത്തിന്റെ ആദ്യ ദിവസം വരെയാണ്. ഭൂരിഭാഗം സ്ത്രീകളിലും 28 ദിവസമാണ് ഒരു സൈക്കിൾ ഉണ്ടാകാറുള്ളത്. എന്നാൽ ഇതിന്റെ ദൈർഘ്യം ഓരോരുത്തർക്കും വ്യത്യസ്തമായിരിക്കാം, അതനുസരിച്ച് ഓവുലേഷൻ നടക്കുന്ന സമയത്തിലും മാറ്റങ്ങൾ വരാം.

ഗർഭധാരണത്തിൽ ഓവുലേഷന് വളരെ വലിയ പങ്കുണ്ട്. അണ്ഡാശയത്തിൽ നിന്ന് അണ്ഡം പുറത്തുവരുന്ന സമയത്ത് ബീജവുമായി സംയോജനം നടക്കുകയാണെങ്കിൽ ബീജസങ്കലനം സംഭവിക്കുന്നു.

ആർത്തവം തുടങ്ങുന്ന ആദ്യ ദിവസമാണ് ആ സൈക്കിളിലെ ഒന്നാം ദിവസമായി കണക്കാക്കുന്നത്. 28 ദിവസമുള്ള ഒരു ആർത്തവചക്രത്തിൽ, സാധാരണയായി അടുത്ത ആർത്തവത്തിന് ഏകദേശം 14 ദിവസം മുമ്പാണ് ഓവുലേഷൻ നടക്കാറുള്ളത്. എന്നാൽ എല്ലാ സ്ത്രീകളിലും ഇത് ഒരുപോലെ ആകണമെന്നില്ല. ഓവുലേഷൻ സമയത്ത് അണ്ഡവും ബീജവും കണ്ടുമുട്ടുമ്പോഴാണ് ബീജസങ്കലനം നടക്കുന്നത്. ബീജസങ്കലനത്തിന് ശേഷം ഭ്രൂണം ഗർഭാശയത്തിലേക്ക് നീങ്ങുകയും ഗർഭാശയ ഭിത്തിയിൽ ഉറച്ചുനിൽക്കുകയും ചെയ്യുന്നു. ഭ്രൂണം ഉറച്ചുനിന്ന ശേഷമാണ് പ്രഗ്നൻസി ടെസ്റ്റുകളിൽ തെളിയുന്ന hCG ഹോർമോൺ ശരീരം ഉൽപ്പാദിപ്പിച്ചു തുടങ്ങുന്നത്. ഓരോ സ്ത്രീയിലും ഓവുലേഷനും ബീജസങ്കലനവും നടക്കുന്ന സമയം വ്യത്യസ്തമായതിനാൽ, ലൈംഗികബന്ധത്തിൽ ഏർപ്പെട്ട തീയതി മാത്രം വച്ച് പ്രഗ്നൻസി ടെസ്റ്റ് എന്ന് പോസിറ്റീവാകും എന്ന് കൃത്യമായി പറയാൻ ബുദ്ധിമുട്ടാണ്.

ഗർഭധാരണത്തിന് ശേഷം എത്ര ദിവസം കഴിഞ്ഞാൽ പ്രഗ്നൻസി തിരിച്ചറിയാൻ സാധിക്കും?

ഓവുലേഷൻ, ബീജസങ്കലനം, ഭ്രൂണം ഗർഭാശയത്തിൽ ഉറച്ചുനിൽക്കുക എന്നിവ എപ്പോഴാണ് നടന്നത് എന്നതിനെ ആശ്രയിച്ചാണ് ഗർഭധാരണത്തിന് ശേഷം എത്ര വേഗത്തിൽ അത് ടെസ്റ്റിലൂടെ കണ്ടെത്താൻ സാധിക്കും എന്ന് നിശ്ചയിക്കുന്നത്.

ബീജസങ്കലനത്തിന് ശേഷം ഭ്രൂണം ഗർഭാശയ ഭിത്തിയിൽ ഉറച്ചുനിൽക്കാൻ ഏതാനും ദിവസങ്ങളെടുക്കും. ഇത്തരത്തിൽ ഇംപ്ലാന്റേഷൻ നടന്നു കഴിഞ്ഞാൽ ഉടൻ തന്നെ ശരീരത്തിൽ hCG ഹോർമോണിന്റെ ഉൽപ്പാദനം ആരംഭിക്കുകയും സമയത്തിനനുസരിച്ച് ഇതിന്റെ അളവ് കൂടുകയും ചെയ്യുന്നു. ടെസ്റ്റിൽ തെളിയാൻ ആവശ്യമായ അളവിൽ hCG ഹോർമോൺ ഉയരുമ്പോഴാണ് പ്രഗ്നൻസി ടെസ്റ്റ് പോസിറ്റീവാകുന്നത്.

എപ്പോൾ പ്രഗ്നൻസി ടെസ്റ്റ് ചെയ്യണം?

ടെസ്റ്റ് ചെയ്യേണ്ട സമയം സാഹചര്യമനുസരിച്ച് മാറും. താഴെപ്പറയുന്ന കാര്യങ്ങൾ ശ്രദ്ധിച്ചാൽ കൂടുതൽ കൃത്യമായ ഫലം ലഭിക്കും:

• പ്രതീക്ഷിക്കുന്ന ആർത്തവ തീയതി അടിസ്ഥാനമാക്കി: ആർത്തവം തെറ്റുന്ന സമയത്തോ അതിനുശേഷമോ ടെസ്റ്റ് ചെയ്യുന്നതാണ് കൂടുതൽ കൃത്യമായ ഫലം നൽകുക.
• സുരക്ഷിതമല്ലാത്ത ലൈംഗികബന്ധത്തിന് ശേഷം: ബന്ധപ്പെട്ട തീയതി മാത്രം വച്ച് എന്ന് ടെസ്റ്റ് ചെയ്യണമെന്ന് തീരുമാനിക്കാൻ കഴിയില്ല. കാരണം ബീജത്തിന് ശരീരത്തിൽ ഏതാനും ദിവസങ്ങൾ വരെ ജീവനോടെയിരിക്കാൻ സാധിക്കും. ഈ സമയത്തിനുള്ളിൽ ഓവുലേഷൻ നടക്കുകയാണെങ്കിൽ പിന്നീട് ബീജസങ്കലനവും നടക്കാം.
• ഓവുലേഷന് ശേഷം: ഓവുലേഷൻ കഴിഞ്ഞ ഉടൻ തന്നെ ടെസ്റ്റ് ചെയ്താൽ കൃത്യമായ ഫലം ലഭിക്കാൻ സാധ്യത കുറവാണ്. കാരണം ഭ്രൂണം ഗർഭാശയത്തിൽ ഉറച്ചുനിൽക്കുന്നതിനും hCG ഹോർമോൺ വർദ്ധിക്കുന്നതിനും വീണ്ടും സമയമെടുക്കും. അതിനാൽ ആർത്തവം തെറ്റുന്നത് വരെ കാത്തിരിക്കുന്നതാണ് കൂടുതൽ അനുയോജ്യം.

ഗർഭധാരണം മുതൽ പ്രഗ്നൻസി ടെസ്റ്റ് പോസിറ്റീവാകുന്നത് വരെ എന്താണ് സംഭവിക്കുന്നത്?

ഗർഭധാരണം നടന്ന് ഒരു പ്രഗ്നൻസി ടെസ്റ്റ് പോസിറ്റീവ് ആകുന്നതുവരെ ചില ശാരീരിക പ്രക്രിയകൾ ഘട്ടംഘട്ടമായി നടക്കാറുണ്ട്. ഇവ ഏതൊക്കെയാണെന്ന് നോക്കാം:

• ഓവുലേഷൻ: അണ്ഡാശയത്തിൽ നിന്ന് അണ്ഡം പുറത്തുവരുന്നു. ഓവുലേഷൻ നടക്കുന്ന കൃത്യമായ ദിവസം എല്ലാ സ്ത്രീകളിലും ഒരുപോലെയായിരിക്കില്ല.
• ബീജസങ്കലനം: ഓവുലേഷൻ നടക്കുന്ന സമയത്ത് അണ്ഡവും ബീജവും കണ്ടുമുട്ടുന്നു. ഇതാണ് ഗർഭധാരണത്തിന്റെ തുടക്കം.
• ഭ്രൂണവളർച്ചയും ഗർഭാശയത്തിലേക്കുള്ള യാത്രയും: വളർച്ച ഘട്ടത്തിലുള്ള ഭ്രൂണം ഫാലോപ്യൻ ട്യൂബിൽ നിന്ന് ഗർഭാശയത്തിലേക്ക് നീങ്ങുന്നു.
• ഇംപ്ലാന്റേഷൻ: ഭ്രൂണം ഗർഭാശയ ഭിത്തിയിൽ ഉറച്ചുനിൽക്കുന്നു.
• hCG ഹോർമോണിന്റെ അളവ് കൂടുന്നത്: ഗർഭധാരണത്തിന്റെ ആദ്യഘട്ടത്തിൽ hCG ഹോർമോണിന്റെ അളവ് വർദ്ധിക്കാൻ തുടങ്ങുന്നു. തുടർന്നുള്ള ദിവസങ്ങളിൽ ഈ ഹോർമോണിന്റെ അളവ് ഉയർന്ന്, ടെസ്റ്റിൽ അറിയാൻ പാകത്തിലുള്ള അളവിൽ എത്തുമ്പോഴാണ് പ്രഗ്നൻസി ടെസ്റ്റ് പോസിറ്റീവാകുന്നത്.

തുടക്കത്തിലുള്ള പ്രഗ്നൻസി ലക്ഷണങ്ങൾ എപ്പോഴാണ് കണ്ടുതുടങ്ങുക?

ഗർഭധാരണത്തിന്റെ മാറ്റങ്ങൾ എത്ര വേഗത്തിൽ അറിയാൻ സാധിക്കും എന്നത് ഓരോ സ്ത്രീയിലും വ്യത്യസ്തമായിരിക്കും. ബീജസങ്കലനം നടന്ന ഉടൻ തന്നെ ലക്ഷണങ്ങൾ അനുഭവപ്പെടണമെന്നില്ല. ആദ്യ ദിവസങ്ങളിൽ ചിലർക്ക് യാതൊരു ലക്ഷണങ്ങളും തോന്നാറില്ല, എന്നാൽ മറ്റു ചിലരിൽ ആർത്തവം തെറ്റുന്ന സമയത്തോ അതിനുശേഷമോ മാറ്റങ്ങൾ കണ്ടുതുടങ്ങാം.

എപ്പോഴാണ് പ്രഗ്നൻസി പരിശോധിക്കേണ്ടത്?

ആർത്തവം തെറ്റുന്ന ദിവസം മുതൽ ഹോം പ്രഗ്നൻസി ടെസ്റ്റ് ചെയ്യാവുന്നതാണ്. ഗർഭം ധരിച്ചിട്ടുണ്ടെങ്കിൽ പോലും, വളരെ നേരത്തെ ടെസ്റ്റ് ചെയ്താൽ ശരീരത്തിൽ hCG ഹോർമോണിന്റെ അളവ് കുറവായതുകൊണ്ട് റിസൾട്ട് നെഗറ്റീവ് ആയി കാണിച്ചേക്കാം. ആർത്തവം തെറ്റുകയും ടെസ്റ്റ് നെഗറ്റീവ് ആകുകയും ചെയ്ത ശേഷവും പിരീഡ്സ് വരുന്നില്ലെങ്കിൽ, ഏതാനും ദിവസങ്ങൾക്ക് ശേഷം വീണ്ടും ടെസ്റ്റ് ചെയ്തു നോക്കുന്നതാണ് നല്ലത്. ഗർഭധാരണം സ്ഥിരീകരിക്കുന്നതിനായി ഒരു ഗൈനക്കോളജിസ്റ്റിനെ കാണുന്നതാണ് ഏറ്റവും അനുയോജ്യം.

ആർത്തവം തെറ്റുന്നതിന് മുമ്പ് പ്രഗ്നൻസി ടെസ്റ്റ് ചെയ്യാൻ സാധിക്കുമോ?

ആർത്തവം തെറ്റുന്നതിന് മുമ്പ് തന്നെ ഗർഭധാരണം കണ്ടെത്താൻ കഴിയുമെന്ന് ചില പ്രഗ്നൻസി ടെസ്റ്റ് കിറ്റുകൾ അവകാശപ്പെടാറുണ്ട്. എന്നാൽ വളരെ നേരത്തെ ടെസ്റ്റ് ചെയ്യുന്നത് കൃത്യമായ ഫലം നൽകണമെന്നില്ല, കാരണം ആ സമയത്ത് hCG ഹോർമോണിന്റെ അളവ് വളരെ കുറവായിരിക്കാം. പിരീഡ്സിന് മുമ്പ് ചെയ്യുന്ന ടെസ്റ്റിൽ നെഗറ്റീവ് റിസൾട്ട് വന്നതുകൊണ്ട് മാത്രം ഗർഭം ധരിച്ചിട്ടില്ല എന്ന് ഉറപ്പിക്കാൻ കഴിയില്ല. ആർത്തവം തെറ്റിയ ശേഷമോ അല്ലെങ്കിൽ കുറച്ചു ദിവസങ്ങൾക്ക് ശേഷമോ വീണ്ടും ടെസ്റ്റ് ചെയ്യുന്നതാണ് കൂടുതൽ നല്ലത്.

രാവിലെ തന്നെ പ്രഗ്നൻസി ടെസ്റ്റ് ചെയ്യുന്നതാണോ കൂടുതൽ നല്ലത്?

ഗർഭധാരണത്തിന്റെ തുടക്കത്തിൽ തന്നെ ടെസ്റ്റ് ചെയ്യുകയാണെങ്കിൽ, രാവിലെയുള്ള ആദ്യത്തെ മൂത്രം ഉപയോഗിക്കുന്നത് നന്നായിരിക്കും. ഇതിന് സാന്ദ്രത കൂടുതലായതിനാൽ hCG ഹോർമോണിന്റെ ചെറിയ അളവ് പോലും കണ്ടെത്താൻ എളുപ്പമായിരിക്കും. എന്നാൽ ആർത്തവം തെറ്റി ഏതാനും ദിവസങ്ങൾ കഴിയുന്നതോടെ hCG ഹോർമോണിന്റെ അളവ് ഉയരുന്നതിനാൽ, കിറ്റിലെ നിർദ്ദേശങ്ങൾ കൃത്യമായി പാലിച്ചുകൊണ്ട് ദിവസത്തിന്റെ ഏത് സമയത്തും ടെസ്റ്റ് ചെയ്യാവുന്നതാണ്.

ലൈംഗികബന്ധത്തിന് ശേഷം എത്ര ദിവസം കഴിഞ്ഞാൽ പ്രഗ്നൻസി ടെസ്റ്റ് ചെയ്യണം?

ബന്ധപ്പെട്ട് ഏതാനും ദിവസങ്ങൾക്കുള്ളിൽ തന്നെ ടെസ്റ്റ് ചെയ്യുന്നത് സാധാരണയായി കൃത്യമായ ഫലം നൽകാറില്ല. കാരണം ലൈംഗികബന്ധം നടന്ന് ബീജസങ്കലനം സംഭവിക്കുന്നത് വരെയുള്ള സമയം എല്ലാ ആർത്തവചക്രത്തിലും ഒരുപോലെ ആയിരിക്കില്ല. അതിനാൽ ബന്ധപ്പെട്ട തീയതി മാത്രം കണക്കാക്കുന്നതിനേക്കാൾ, പ്രതീക്ഷിക്കുന്ന ആർത്തവ തീയതി അടുക്കുമ്പോഴോ അത് തെറ്റുമ്പോഴോ ടെസ്റ്റ് ചെയ്യുന്നതാണ് കൂടുതൽ ഫലപ്രദമായിരിക്കുക.

പ്രഗ്നൻസി ടെസ്റ്റ് നെഗറ്റീവ് ആകുകയും എന്നാൽ ആർത്തവം വരാതിരിക്കുകയും ചെയ്താൽ എന്ത് ചെയ്യണം?

ടെസ്റ്റ് നെഗറ്റീവ് ആയിട്ടും ആർത്തവം തെറ്റുന്നതിന് പല കാരണങ്ങൾ ഉണ്ടാകാം. വളരെ നേരത്തെ ടെസ്റ്റ് ചെയ്യുന്നത്, ഓവുലേഷൻ വൈകുന്നത്, അല്ലെങ്കിൽ ആർത്തവക്രമക്കേടുകൾ എന്നിവ ഇതിൽ ചിലതാണ്. ഇത്തരം സാഹചര്യങ്ങളിൽ താഴെപ്പറയുന്നത് ചെയ്യാം:

• ഏതാനും ദിവസങ്ങൾക്ക് ശേഷം വീണ്ടും ടെസ്റ്റ് ചെയ്തു നോക്കുക.
• വീണ്ടും ആർത്തവം വൈകുകയാണെങ്കിൽ ഒരു ഡോക്ടറെ കാണുക.
• ടെസ്റ്റുകൾ വീണ്ടും നെഗറ്റീവ് ആകുകയും ആർത്തവത്തിലെ മാറ്റങ്ങൾ തുടരുകയും ചെയ്യുന്നുണ്ടെങ്കിൽ, ഇതിന്റെ മറ്റു കാരണങ്ങൾ കണ്ടെത്തുന്നതിനായി ഡോക്ടറുടെ സഹായം തേടാവുന്നതാണ്.

വ്യത്യസ്ത സാഹചര്യങ്ങളിൽ എപ്പോഴാണ് പ്രഗ്നൻസി കണ്ടെത്താൻ സാധിക്കുക?

ആരോഗ്യാവസ്ഥയും ചികിത്സാരീതിയും അനുസരിച്ച് പ്രഗ്നൻസി ടെസ്റ്റ് ചെയ്യേണ്ട സമയവും ടെസ്റ്റിന്റെ തരവും മാറാം. താഴെയുള്ള പട്ടികയിൽ ഇത് വിശദമാക്കുന്നു:

സാഹചര്യം	എപ്പോഴാണ് ടെസ്റ്റ് ചെയ്യേണ്ടത്?	ഏത് ടെസ്റ്റാണ് അനുയോജ്യം?
ക്രമമായ ആർത്തവവും സ്വാഭാവിക ഗർഭധാരണവും	ആർത്തവം തെറ്റുന്ന സമയത്തോ അതിനുശേഷമോ	വീട്ടിൽ ചെയ്യാവുന്ന മൂത്രം ഉപയോഗിച്ചുള്ള പ്രഗ്നൻസി ടെസ്റ്റ്
ആർത്തവം തെറ്റിയെങ്കിലും ടെസ്റ്റ് നെഗറ്റീവ് ആയാൽ	ഏതാനും ദിവസങ്ങൾക്ക് ശേഷം വീണ്ടും ടെസ്റ്റ് ചെയ്യുക	മൂത്രം ഉപയോഗിച്ചുള്ള ടെസ്റ്റ്
ക്രമരഹിതമായ ആർത്തവം അല്ലെങ്കിൽ PCOS	ആർത്തവ തീയതി വച്ച് മാത്രം സമയം കണക്കാക്കുന്നത് ബുദ്ധിമുട്ടാണ്	ഡോക്ടറുടെ നിർദ്ദേശപ്രകാരം മൂത്രം ഉപയോഗിച്ചുള്ള ടെസ്റ്റോ ബീറ്റാ-hCG ടെസ്റ്റോ ചെയ്യാം
IUI ചികിത്സയ്ക്ക് ശേഷം	ഡോക്ടർ നിർദ്ദേശിക്കുന്ന സമയത്ത് (സാധാരണയായി 2 ആഴ്ചയ്ക്ക് ശേഷം)	ബീറ്റാ-hCG അല്ലെങ്കിൽ മൂത്രം ഉപയോഗിച്ചുള്ള ടെസ്റ്റ്
IVF ചികിത്സയ്ക്ക് ശേഷം	ഭ്രൂണമാറ്റത്തിന് ശേഷം ഡോക്ടർ നിശ്ചയിച്ചു നൽകുന്ന തീയതിയിൽ	ബീറ്റാ-hCG ബ്ലഡ് ടെസ്റ്റ്

IVF, IUI ചികിത്സകൾക്ക് ശേഷം വളരെ നേരത്തെ ടെസ്റ്റ് ചെയ്യുന്നത് ചികിത്സയുടെ ഭാഗമായി നൽകുന്ന hCG ഹോർമോൺ അടങ്ങിയ ട്രിഗർ മരുന്നുകൾ കാരണം തെറ്റായ പോസിറ്റീവ് റിസൾട്ട് (false-positive) കാണിക്കാൻ സാധ്യതയുണ്ട്. അതിനാൽ ഫെർട്ടിലിറ്റി ഡോക്ടറോ ടീമോ നിർദ്ദേശിക്കുന്ന തീയതിയിൽ തന്നെ ടെസ്റ്റ് ചെയ്യുന്നതാണ് കൂടുതൽ ഉചിതം.

തുടക്കത്തിലുള്ള പ്രഗ്നൻസി ലക്ഷണങ്ങൾ

ഗർഭധാരണത്തിൽ കണ്ടേക്കാവുന്ന ചില ലക്ഷണങ്ങൾ ഇവയാണ്:

• ആർത്തവം തെറ്റുന്നത്
• അടിക്കടി മൂത്രമൊഴിക്കാൻ തോന്നുന്നത്
• ക്ഷീണം
• ഓക്കാനവും ഛർദ്ദിയും
• സ്തനങ്ങളിൽ ഉണ്ടാകുന്ന വേദന, ഭാരം, അല്ലെങ്കിൽ തരിപ്പ്
• ചെറുതായുണ്ടാകുന്ന രക്തസ്രാവം
• തലവേദന
• പെട്ടെന്നുണ്ടാകുന്ന മൂഡ് മാറ്റങ്ങൾ
• ചില ഭക്ഷണങ്ങളോട് പ്രത്യേക താല്പര്യമോ അല്ലെങ്കിൽ വെറുപ്പോ തോന്നുന്നത്
• ചില മണങ്ങളോട് കൂടുതൽ പ്രതികരണം തോന്നുന്നത്

ഇത്തരം ലക്ഷണങ്ങൾ കാണുകയാണെങ്കിൽ പ്രഗ്നൻസി ടെസ്റ്റ് ചെയ്തു നോക്കാവുന്നതാണ്. എന്നാൽ ലക്ഷണങ്ങൾ മാത്രം വച്ച് ഗർഭധാരണം സ്ഥിരീകരിക്കാൻ കഴിയില്ല.

ഗർഭധാരണത്തിന്റെ ആദ്യ ദിവസങ്ങളിൽ ലക്ഷണങ്ങളൊന്നും കാണാതിരിക്കുന്നത് സാധാരണമാണോ?

അതെ, തുടക്കത്തിൽ ലക്ഷണങ്ങളൊന്നും തന്നെ ഇല്ലാതിരിക്കുന്നത് തികച്ചും സാധാരണമാണ്. ഗർഭധാരണത്തിന്റെ ആദ്യ മാറ്റങ്ങൾ ഓരോ സ്ത്രീയിലും വ്യത്യസ്തമായിരിക്കും. ചിലർക്ക് ആർത്തവം തെറ്റുന്നതിന് മുമ്പ് തന്നെ ക്ഷീണം, സ്തനങ്ങളിലെ വേദന, അല്ലെങ്കിൽ ഓക്കാനം എന്നിവ അനുഭവപ്പെടാം. എന്നാൽ മറ്റു ചിലർക്ക് ആഴ്ചകളോളം പ്രത്യേക ലക്ഷണങ്ങളൊന്നും അനുഭവപ്പെടണമെന്നില്ല. ലക്ഷണങ്ങൾ ഇല്ല എന്നതുകൊണ്ട് ഗർഭം ധരിച്ചിട്ടില്ല എന്ന് അർത്ഥമില്ല. കൃത്യമായ സമയത്ത് പ്രഗ്നൻസി ടെസ്റ്റ് ചെയ്യുന്നതാണ് ഗർഭധാരണം സ്ഥിരീകരിക്കാൻ ഏറ്റവും നല്ല വഴി.

ഇംപ്ലാന്റേഷൻ സ്പോട്ടിങ് ഉണ്ടാക്കുമോ?

തുടക്കത്തിൽ ചില സ്ത്രീകളിൽ ചെറിയ രീതിയിൽ സ്പോട്ടിങ് കണ്ടേക്കാം, ഇത് ചിലപ്പോൾ ഇംപ്ലാന്റേഷൻ നടക്കുന്നതുകൊണ്ടാകാം. എന്നാൽ എല്ലാ സ്ത്രീകൾക്കും ഇങ്ങനെ ഉണ്ടാകണമെന്നില്ല, അതുപോലെ ഇതൊരു ലക്ഷണമായി കണക്കാക്കാനും കഴിയില്ല. കൂടിയ രക്തസ്രാവം, തുടർച്ചയായതോ അല്ലെങ്കിൽ അതികഠിനമായ അടിവയറു വേദന, തലകറക്കം, തളർച്ച എന്നിവയുണ്ടെങ്കിൽ ഉടൻ തന്നെ ഒരു ഡോക്ടറെ കാണേണ്ടതാണ്.

പ്രഗ്നൻസി ടെസ്റ്റ് പോസിറ്റീവ് ആയാൽ എന്താണ് ചെയ്യേണ്ടത്?

ഹോം പ്രഗ്നൻസി ടെസ്റ്റ് പോസിറ്റീവായാൽ ഒരു ഡോക്ടറെയോ ഫെർട്ടിലിറ്റി സ്പെഷ്യലിസ്റ്റിനെയോ ബന്ധപ്പെടുക. നിങ്ങളുടെ അവസ്ഥയ്ക്കനുസരിച്ച് ഡോക്ടർ ബീറ്റാ-hCG (Beta-hCG) ബ്ലഡ് ടെസ്റ്റോ മറ്റു പരിശോധനകളോ നിർദ്ദേശിച്ചേക്കാം. IVF വഴിയാണ് ഗർഭധാരണം നടന്നതെങ്കിൽ, ഫെർട്ടിലിറ്റി ടീം നിർദ്ദേശിച്ച മരുന്നുകളും ഫോളോ-അപ്പുകളും കൃത്യമായി തുടരുക. ഡോക്ടറുടെ ഉപദേശമില്ലാതെ ഒരു മരുന്നും നിർത്തിവെക്കരുത്. പ്രഗ്നൻസി ടെസ്റ്റ് പോസിറ്റീവാകുന്നതിനോടൊപ്പം കഠിനമായ അടിവയറു വേദന, അമിതമായ രക്തസ്രാവം, ബോധക്ഷയം, അല്ലെങ്കിൽ അമിതമായ തലകറക്കം എന്നിവയുണ്ടെങ്കിൽ അടിയന്തരമായി വൈദ്യസഹായം തേടുക.

എപ്പോഴാണ് ഡോക്ടറെ കാണേണ്ടത്?

ടെസ്റ്റ് റിസൾട്ട് പോസിറ്റീവ് ആവുകയോ, റിസൾട്ടിൽ വ്യക്തതയില്ലാതിരിക്കുകയോ, അല്ലെങ്കിൽ ആർത്തവം തെറ്റിയിട്ടും റിസൾട്ട് നെഗറ്റീവ് ആവുകയോ ചെയ്താൽ ഒരു ഡോക്ടറെ കാണേണ്ടതാണ്. ആവശ്യാനുസരണം ബ്ലഡ് ടെസ്റ്റോ മറ്റ് പരിശോധനകളോ നിർദ്ദേശിക്കാൻ ഡോക്ടർക്ക് സാധിക്കും.

പ്രഗ്നൻസി ടെസ്റ്റ് പോസിറ്റീവായാൽ എപ്പോഴാണ് സ്കാനിംഗ് ചെയ്യേണ്ടത്?

ഗർഭാവസ്ഥയെയും ഡോക്ടറുടെ നിർദ്ദേശത്തെയും ആശ്രയിച്ചാണ് സ്കാനിംഗിന്റെ കൃത്യമായ സമയം നിശ്ചയിക്കുന്നത്. ഗർഭധാരണത്തിന്റെ ആദ്യ ഘട്ടങ്ങളിൽ സ്കാനിംഗ് നടത്തിയാൽ ഭ്രൂണവും അനുബന്ധ മാറ്റങ്ങളും വ്യക്തമായി കാണണമെന്നില്ല. ഗർഭധാരണ സമയവും hCG റിസൾട്ടുകളും കണക്കാക്കിയാണ് സ്കാനിംഗ് എപ്പോൾ വേണമെന്ന് ഡോക്ടർ തീരുമാനിക്കുന്നത്.

ഗർഭം ധരിക്കാൻ പ്ലാൻ ചെയ്യുമ്പോൾ എന്തൊക്കെ കാര്യങ്ങൾ അറിഞ്ഞിരിക്കണം?

ഗർഭം ധരിക്കാൻ പ്ലാൻ ചെയ്യുകയാണെങ്കിൽ, ഓവുലേഷനെക്കുറിച്ചും ഗർഭധാരണത്തിന് ഏറ്റവും സാധ്യതയുള്ള ദിവസങ്ങളെക്കുറിച്ചും മനസ്സിലാക്കുന്നത് ഉപകരിക്കും. ഓവുലേഷൻ നടക്കുന്ന ദിവസങ്ങളോട് അനുബന്ധിച്ച് ഗർഭം ധരിക്കാനുള്ള സാധ്യത കൂടുതലാണ്. അതിൽ ശ്രദ്ധിക്കേണ്ട ചില കാര്യങ്ങൾ താഴെ പറയുന്നവയാണ്:

• നിങ്ങളുടെ ആർത്തവചക്രം കൃത്യമായി ട്രാക്ക് ചെയ്യുക.
• ഓവുലേഷനെക്കുറിച്ചും ഫെർട്ടൈൽ ദിവസങ്ങളെക്കുറിച്ചും ധാരണയുണ്ടായിരിക്കുക.
• ആവശ്യമെങ്കിൽ ഡോക്ടറുടെ നിർദ്ദേശപ്രകാരം ഒരു ഓവുലേഷൻ പ്രെഡിക്റ്റർ കിറ്റ് ഉപയോഗിക്കാവുന്നതാണ്.
• ഗർഭധാരണത്തിന് തയ്യാറെടുക്കുമ്പോൾ പോഷകസമൃദ്ധമായ ഭക്ഷണവും ആരോഗ്യകരമായ ജീവിതശൈലിയും പിന്തുടരുക.
• ഫോളിക് ആസിഡിന്റെ ആവശ്യകതയെക്കുറിച്ചും അത് കഴിക്കേണ്ട കൃത്യമായ അളവിനെക്കുറിച്ചും ഡോക്ടറോട് സംസാരിക്കുക.
• ആർത്തവം വളരെ ക്രമരഹിതമാണെങ്കിൽ ഒരു ഗൈനക്കോളജിസ്റ്റിന്റെ ഉപദേശം തേടുന്നത് നല്ലതാണ്.
• ദീർഘനാളായി ഗർഭധാരണം നടക്കുന്നില്ലെങ്കിൽ ഒരു ഫെർട്ടിലിറ്റി സ്പെഷ്യലിസ്റ്റിനെ കാണുക.